बेरोजगारांचे कमिन्सवर ठिय्या आंदोलन

एकता दर्शन : सुरवडी ता.फलटण येथे सुरू असलेल्या बहुराष्ट्रीय कमिन्स कंपनी मध्ये स्थानिक भूमिपुत्रांना कायमस्वरूपी रोजगार मिळावा या पार्श्वभूमीवर गाव व परिसरातील बेरोजगार तरुणांनी आज गुरुवार दि.९ मार्च रोजी कंपनीच्या मुख्य प्रवेशद्वारासमोर ठिय्या आंदोलन सुरू केले.

गेली अनेक वर्षांपासून सुरवडी या ठिकाणी महाराष्ट्र औद्योगिक विकास महामंडळ अंतर्गत कमिन्स नावाची बहुराष्ट्रीय कंपनी सुरू आहे. महाराष्ट्र औद्योगिक विकास महामंडळाला स्थानिकांनी स्वतःच्या जमिनी देऊन त्याग केला त्याचा मोबदला म्हणून स्थानिकांना कायम नोकरीत घेणे क्रमप्राप्त असताना त्यांना अद्यापही नोकरीवर घेतले नसल्याचा स्थानिकांचा आरोप आहे. 

२६ जानेवारी २०२३ रोजी येथील ग्रामपंचायतीच्या ग्रामसभेत स्थानिकांना रोजगार मिळावा अशा आशयाचा ठराव घेण्यात आला होता. ठरावाची माहिती कमिन्स कंपनीच्या प्रशासनाला दिली होती. त्यानंतर फेब्रुवारी २०२३ अखेर आपण योग्य तो निर्णय घेऊ असे कमिन्सने कळविले होते. मात्र अद्यापही कंपनीकडून कोणताही निर्णय घेतला नसल्याचे आंदोलनकर्त्यांचे म्हणणे आहे.

आठ दिवसात या बाबत प्रशासनाने विचार विनिमय करून संबंधित तरुणांना शैक्षणिक पात्रतेनुसार कायमस्वरूपी अथवा अन्य कंत्राट विभागात नोकरी द्यावी, अन्यथा १६ मार्च पासून फलटण शहरातील नाना पाटील चौक ते प्रांत कार्यालय दरम्यान अर्ध नग्न व भिक मागो आंदोलन करण्यात येणार असल्याचा इशारा यावेळी उपस्थित तरुणांनी कमिन्स प्रशासनास दिला आला आहे.

दरम्यान, बेरोजगार तरुणांच्या वतीने कमिन्स कंपनीच्या प्रशासनास निवेदन देण्यात आले आहे. निवेदनाच्या प्रती महाराष्ट्र औद्योगिक विकास महामंडळ (कोल्हापूर) क्षेत्रीय व्यवस्थापक, जिल्हाधिकारी सातारा, प्रांताधिकारी फलटण, फलटण ग्रामीण पोलीस ठाणे यांना देण्यात आल्या आहेत.