माँ रुद्रात्मिका गुरुमाई यांच्या 'फकिरीयत' चित्रपटाचा फलटणमध्ये भव्य शुभारंभ

प्रारंभी फलटण येथील साधकांच्यावतीने गुरुमाई यांचे स्वागत करण्यात आले. त्यानंतर 'क्रियायोग भूषण' नावाचा पुरस्कार देऊन त्यांना गौरविण्यात आले. यावेळी श्री व सौ डॉ.गुळवणी, डॉ.माधव पोळ, डॉ.अलका पोळ, डॉ.प्रसाद जोशी, डॉ.किरणकुमार नाळे, डॉ.राजश्री नाळे, मंगेश दोषी, पुजा दोषी, कैलास साळुंके, राकेश हेंद्रे, बाबाजी काळे, बारामतीचे डॉ.सुजित अडसूळ, अ‍ॅड.योगेश वाघ आदी मान्यवर उपस्थित होते.

ज्यांच्या जीवनावर हा चित्रपट आधारित आहे त्या स्वतः रुद्रात्मिका गुरुमाई यांनी सर्व प्रेक्षकांसोबत 'फकिरीयत' हा चित्रपट पाहिला. चित्रपटगृहाची आसन क्षमता ३८० होती, प्रत्यक्षात ४६० हून अधिक प्रेक्षकांनी हा चित्रपट पाहण्यासाठी गर्दी केली असल्याने अतिरिक्त खुर्च्यांची व्यवस्था करावी लागली.

चित्रपट संपल्यानंतर रुद्रात्मिका गुरुमाई यांनी पत्रकार परिषद घेतली. यावेळी उपस्थित असलेल्या सर्वांना मार्गदर्शन करत अनेकांच्या आध्यात्मिक प्रश्नांवर त्यांनी सुंदर भाष्य केले. क्रियायोग हे प्राचीन असून सर्वांगीण विकास करणारे ध्यान, प्राणायाम, मुद्रा यांचे संयोजन व प्राचीन आध्यात्मिक ज्ञान असल्याचे सांगत अध्यात्म, ध्यान, पाखंड आणि तंत्र या संकल्पना स्पष्ट केल्या. क्रियायोग नेमका कसा करायचा, त्याचे जीवनातील फायदे काय आहेत, यावर सखोल माहिती देत तरुणांनी आध्यात्मिक मार्गावर येण्याचे रुद्रात्मिका गुरुमाई यांनी यावेळी आवाहन केले.