बौद्ध समाजाच्या उमेदवारीला माझा विरोध नाही ; पक्षाकडे रीतसर मागणी करा

आगामी विधानसभा निवडणुकीत फलटण-कोरेगाव विधानसभा मतदारसंघात बौध्द समाजाला उमेदवारी देण्याची मागणी 'फलटण संविधान समर्थन समिती'च्यावतीने विधान परिषदेचे माजी सभापती श्रीमंत रामराजे नाईक-निंबाळकर यांच्याकडे निवेदनाद्वारे करण्यात आली.

दरम्यान, माझा बौद्ध समाजाच्या उमेदवारीला विरोध नसून राष्ट्रवादी काँग्रेस पक्षाकडे आपण रीतसर उमेदवारीची मागणी करावी त्या मागणीस सहकार्य राहील, अशी भूमिका श्रीमंत रामराजे यांनी यावेळी स्पष्ट केली.

फलटण-कोरेगाव विधानसभा मतदारसंघात अनुसूचित जातीत सर्वाधिक लोकसंख्या असलेल्या बौद्ध समाजाने "एकच निर्धार...बौद्ध आमदार..." अशी प्रतिज्ञा घेत तालुक्यात संवाद अभियान सुरू केले आहे. या अभियानास तालुक्यातील सर्वचं गावांत उत्स्फुर्त प्रतिसाद मिळत असून बौद्ध समाजाला उमेदवारी द्यावी, या मागणीच्या पार्श्वभूमीवर दि. ८ रोजी विधान परिषदेचे माजी सभापती व आमदार श्रीमंत रामराजे नाईक-निंबाळकर यांच्याकडे संविधान समर्थन समितीच्यावतीने उमेदवारीची मागणी करण्यात आली.

या मागणीला उत्तर देताना श्रीमंत रामराजे म्हणाले, माझ्या हातात काय आहे. उमेदवारी देणारा मी कोण आहे. पक्षाकडे आपण रीतसर मागणी करावी. त्या मागणीस माझे सहकार्य राहील.