समशेरसिंह यांनी स्विकारला नगराध्यक्षपदाचा पदभार; शहराच्या सर्वांगीण विकासाचे दिले वचन

फलटण नगरपालिकेच्या नगराध्यक्षपदाचा पदभार स्वीकारल्यानंतर ते बोलत होते. यावेळी माजी खासदार रणजितसिंह नाईक-निंबाळकर, आमदार सचिन पाटील, ज्येष्ठ नेते प्रल्हादराव साळुंखे-पाटील, माजी नगराध्यक्ष दिलीपसिंह भोसले, अ‍ॅड. नरसिंह निकम, युवा नेते अभिजित नाईक-निंबाळकर, मिलिंद आप्पा नेवसे, सुदाम मांढरे, सौ. प्रतिभाताई चेतन शिंदे, ऐश्वर्याराजे नाईक-निंबाळकर, रणवीरराजे नाईक-निंबाळकर यांच्यासह नवनिर्वाचित नगरसेवक-नगरसेविका तसेच भारतीय जनता पार्टी व राष्ट्रवादी काँग्रेसचे प्रमुख पदाधिकारी उपस्थित होते.

आगामी काळात शहरातील उद्योजक, व्यापारी, पुरुष, महिला तसेच ज्येष्ठ नागरिक अशा सर्व घटकांना केंद्रबिंदू मानून कारभार केला जाईल. नगरपालिकेचा कारभार अधिक सक्षम कसा होईल आणि नागरिकांचे दैनंदिन जीवन अधिक सुलभ व सुसह्य कसे करता येईल, यावर विशेष भर राहील, असे नगराध्यक्ष समशेरसिंह नाईक निंबाळकर यांनी यावेळी स्पष्ट केले.

फलटण नगरपालिका निवडणुकीत समशेरसिंह नाईक निंबाळकर नगराध्यक्ष होतील आणि भारतीय जनता पार्टीची सत्ता येईल, असा विश्वास मुख्यमंत्री देवेंद्र फडणवीस यांना होता. तो विश्वास माझ्या सर्व सहकाऱ्यांनी व जनतेने सत्यात उतरवला आहे, असे सांगत शहरातील सर्वसामान्य घटकाला अपेक्षित असलेला कारभार नगरपरिषदेच्या माध्यमातून केला जाईल. शहरातील रस्ते, नाट्यगृह, स्टेडियम, सिटी रुग्णालय, वाचनालय, महिलांसाठी जिम आदी महत्त्वाची विकासकामे सुरू करण्यावर भर राहील. पार्किंगचा प्रश्न सोडविण्यासाठी योग्य नियोजन केले जाईल. नगरपालिका प्रशासनावर बाह्यशक्तीऐवजी नागरिकांचाच अंकुश राहील, असा विश्वास माजी खासदार रणजितसिंह नाईक निंबाळकर यांनी यावेळी व्यक्त केला.

जनतेने केलेल्या परिवर्तनाचा आनंद आहे. नगरपालिका आता सर्वसामान्यांची झाली असून शहराच्या विकासासाठी निधीची कमतरता भासू दिली जाणार नाही, असे आश्‍वासन आमदार सचिन पाटील यांनी यावेळी दिले.

नगरपालिकेत प्रवेश करण्यापूर्वी समशेरसिंह नाईक-निंबाळकर यांना वाजत-गाजत घोड्यावरून नगरपालिकेजवळ आणण्यात आले. नगराध्यक्षांच्या कक्षात आल्यानंतर मुख्याधिकारी यांनी पुष्पगुच्छ देऊन त्यांचे स्वागत केले. त्यानंतर यांनी अधिकृतपणे नगराध्यक्षपदाचा पदभार स्वीकारला.