नगरपालिका निवडणुकीचा निकाल विधानसभेच्या धर्तीवर जाहीर करावा

२ डिसेंबर २०२५ रोजी राज्यात विविध ठिकाणी नगरपालिकांच्या निवडणुका पार पडणार आहेत, परंतु काही प्रशासकीय कारणांमुळे सातारा जिल्ह्यातील फलटण व महाबळेश्वर पालिकेची निवडणूक राज्य निवडणूक आयोगाने पुढे तब्बल वीस दिवस ढकलली असून २ डिसेंबर रोजी होणारी मतदान प्रक्रिया २० डिसेंबरला पार पडणार असल्याने २ डिसेंबर रोजी होणार्‍या नगरपालिकेच्या निकालांचा परिमाण फलटण नगरपालिकेच्या निवडणुकीवर होऊ नये म्हणुन सर्वच नगरपालिकांचा निकाल २१ डिसेंबर रोजी जाहीर करण्याची मागणी श्रीमंत रामराजे यांच्या मार्गदर्शनाखाली शिवसेना पक्ष व आघाडीच्या उमेदवारांनी निवडणूक आयोगाकडे केली आहे.

निवेदन देण्यापूर्वी प्रसिद्धी माध्यमांशी बोलताना रामराजे म्हणाले, इलेक्शन विचित्र वळणावर येऊन पोहचली आहे. निवडणूक प्रशासकीय कारणामुळे पुढे गेली असल्याचे समजते. कदाचित आम्ही याचिका दाखल करून आव्हान देण्याचा प्रयत्न करणार आहोत. स्टेट इलेक्शन कमिशनला आपण कळवलेले आहे की, आज या जिल्ह्यात महाबळेश्वर आणि फलटण सोडले तर इतर ठिकाणच्या निवडणुका होऊन जाणार आहेत. तीन तारखेला त्याचे निकाल लागणार आहे. आणि या निकालांचा परिणाम आमच्या इलेक्शनवर होऊ नये म्हणून ज्यापद्धतीने लोकसभेचे इलेक्शन असते, विधानसभेचे इलेक्शन टप्याटप्याने होत असते परंतु निकाल एकाच दिवशी येतात त्याचपद्धतीने इतर नगरपालिकेच्या निवडणुकीचे निकाल राखून ठेवून एकच दिवशी जाहीर करावेत.

कार्यकर्त्यांनो उमेद हरू नका 

कार्यकर्त्यांना माझी विनंती आहे की, अजून दहा दिवस कसं करायचं, असा विचार न करता संपूर्ण ताकदीने प्रचाराला लागून जी यंत्रणा उभी केली आहे, जे वातावरण तयार झालं आहे ते टिकवण्याचा प्रयत्न करणे अत्यंत गरजेचे असून उमेद हरू न देता विजय आपलाच असल्याचे सांगत कार्यकर्त्यांच्यात ऊर्जा निर्माण करण्याचा प्रयत्न श्रीमंती रामराजे यांनी केला.