सामाजिक कार्यात महिलांना प्रोत्साहन दिले पाहिजे : सौ.संजीवनी सावंत

एकता दर्शन : ग्रामीण भागातील समाज व्यवस्थेत काम करणाऱ्या महिलांना प्रोत्साहन देणे ही भारतीय परंपरा असून ती कायम राहण्यासाठी पुरुष वर्गाने पुढे आले पाहिजे. स्वातंत्र्य समता बंधुत्व याची जोपासना होण्यासाठी महिला आर्थिक विकास महामंडळ अंतर्गत ग्रामीण भागातील साधन केंद्रे कार्यरत असून महामंडळाचे उपक्रम स्फूर्ती व प्रेरणा देणारे असल्याचे गौरवोद्गार नायब तहसीलदार सौ.संजीवनी सावंत यांनी काढले.

राज्य शासन अंतर्गत महिला आर्थिक विकास महामंडळ संचलित ओम साई व ज्ञानज्योती साधन केंद्र, नव तेजस्विनी उद्यम विकास प्रकल्प यांच्यावतीने तालुक्यातील सामाजिक पुरुष कार्यकर्त्यांना सुधारक सन्मान पुरस्कार देऊन गौरविण्यात आले याप्रसंगी त्या बोलत होत्या.

यावेळी पोलीस उपनिरीक्षक नितीन किनेकर, म.आ.वि.महामंडळाचे जिल्हा समन्वयक विजय डोके, जिल्हा सहाय्यक अधिकारी अशोक चव्हाण, पंचायत समिती अधीक्षक जालिंदर शिंदे, तालुका पोलीस पाटील संघटनेचे अध्यक्ष दत्तात्रय सरक, मुमताज पठाण, ज्येष्ठ पत्रकार प्रा.रमेश आढाव आदी प्रमुख उपस्थित होते.

फलटण तालुक्यातील विविध क्षेत्रात कार्यरत असणाऱ्या महिला वर्गाला प्रोत्साहन देणे, त्यांच्या कामात सहकार्य व मार्गदर्शन करणे, महिलांचा सन्मान करणारे उपक्रम राबवणे अशा विविध कार्यक्रमात उल्लेखनीय काम करणाऱ्या तालुक्यातील ४६ गावातील सामाजिक पुरुष कार्यकर्त्यांना म.आ.वि.म.च्यावतीने तालुकास्तरावर "सुधारक सन्मान पुरस्कार" देऊन गौरविण्यात आले.

दरम्यान, जिल्हा समन्वयक विजय डोके यांनी महिला आर्थिक विकास महामंडळाच्या विविध उपक्रमांची माहिती दिली. नितीन किनेकर दत्तात्रय सरक किशन काशीद यांची भाषणे झाली.

प्रारंभी उपस्थितांचे स्वागत रेश्मा मोरे यांनी केले, प्रास्ताविक व सूत्रसंचालन ओम साई लोकसंचलित साधन केंद्राच्या सौ.शीला घाडगे त्यांनी केले. आभार सुवर्णा नाळे यांनी मानले. कार्यक्रमास तालुक्यातील विविध साधन केंद्राच्या महिला कार्यकर्त्या मोठ्या संख्येने उपस्थित होत्या.