वारकऱ्यांच्या सेवेसाठी फलटणकरांचे शेकडो हात पुढे

एकता दर्शन : माऊलींचा पालखी सोहळा फलटणच्या श्री प्रभू रामचंद्राच्या नगरीत एक दिवसाच्या मुक्कामासाठी पालखी तळावर विसावला असून पालखी सोहळ्यातील वारकरी पाहुण्यांची सेवा करताना फलटणकरांचे शेकडो हात पुढे झाल्याचे चित्र ठिकठिकाणी पाहायला मिळत होते.

डेक्कन चौक येथील नंदकुमार भोईटे मित्र मंडळ, शंकर मार्केट व्यापारी युवक मंडळ, युवक गणेशोत्सव मंडळ, रविवार पेठ मित्र मंडळ, नवमहाराष्ट्र गणेशोत्सव मंडळ, शुक्रवार पेठ तालीम मित्र मंडळ, क्रांतिसिंह नाना पाटील चौक, विनायक इंजिनिअरिंग वर्क्स, मार्केट यार्ड व्यापारी असोसिएशन, सातारा जिल्हा मध्यवर्ती बँक, श्रीराम बझार, लायन्स क्लब, शिवाजीनगर मित्र मंडळ, जायंट्स ग्रुप, लोकमान्य नर्सिंग होम, बिल्डर्स असोसिएशन यांच्यासह शहरातील विविध सामाजिक, राजकीय, शैक्षणिक संस्था संघटनांच्या वतीने वारकऱ्यांना मोफत चहा, अल्पोपहार, जेवण, मोफत वैद्यकीय तपासणी व उपचार, मोफत औषधे, नेत्र तपासणी, चष्म्यांचे वाटप, मोफत केस कर्तनालय, चप्पल दुरुस्ती आदी विविध प्रकारच्या सेवा पालखी सोहळ्यातील वारकऱ्यांना देण्यात येत होत्या.

एक दिवस मुक्काम असल्याने वारकऱ्यांच्या निवासाची सोय, पाणीपुरवठा, वीजपुरवठा आदी सोयी सुविधा विविध ठिकाणी देण्यासाठी फलटणकरांचे शेकडो हात पुढे येताना दिसत होते. मानवी सेवा हीच ईश्वर सेवा या भावनेतून फलटणकर वारकऱ्यांची सेवा करताना दिसत होते.