जाईन गे माय तया पंढरपुरा। सातारा जिल्ह्याचा माऊलींना निरोप

अवघाचि संसार सुखाचा करीन। आनंदे भरीन तिन्हीं लोक ॥ जाईन गे माय तया पंढरपुरा। भेटेन माहेरा आपुलिया ॥

या अंभगवाणी प्रमाणे विठ्ठलाच्या दर्शनाची ओढ असलेला संत ज्ञानेश्वर माऊलींचा पालखी सोहळा लाखो वैष्णव सागरासह फलटण तालुक्यातील अखेरचा मुक्काम आटोपून दि.२३ रोजी सकाळी बरड पालखी तळावरून पंढरपूरच्या दिशेने मार्गस्थ झाला.

हरिनामाचा जयघोष, टाळ मृदूंगाचा गजर करत नाचत आनंद व्यक्त करीत विठ्ठलाकडे निघालेल्या माऊलींचा पालखी सोहळा बरडमधील गावकऱ्यांचा निरोप घेत सोलापूर जिल्ह्याच्या दिशेने मार्गस्थ झाला. दरम्यान बरड गाव व परिसरातील युवक, अबालवृद्ध, महिला, पुरूष अशा हजारो माऊली भक्तांसह फलटण पूर्व भागातील विविध संस्थाच्या पदाधिकाऱ्यांनी पालखी रथातील माऊलींच्या पादुकांचे दर्शन घेवुन पालखी सोहळ्याला निरोप दिला.

पालखी सोहळा राजुरी गावच्या हद्दीतील साधु बुवा मंदिर परिसरात विसाव्यासाठी थांबविण्यात आला. या ठिकाणी पालखी सोहळा थांबविण्यात येत असल्याची परंपरा गेल्या अनेक वर्षांपासूनची आहे. यावेळी राजुरी पंचक्रोशीतील माऊली भक्तांनी माऊलींच्या दर्शनासाठी प्रंचड गर्दी करीत माऊलींच्या दर्शनाचा लाभ घेतला.

साधु बुवा मंदिर परिसरातील विसाव्यानंतर पालखी सोहळा पुढे मार्गस्थ झाला. चार-पाच किलोमीटर अंतरावर पालखी सोहळा पुढे सरकल्यानंतर सातारा जिल्ह्याची भौगोलिक हद्द समाप्त होते व सोलापूर जिल्ह्याची हद्द सुरू होते. सातारा जिल्हाच्या अखेरच्या सरहद्दीवर पालखी सोहळा पोहचल्यानंतर सातारा जिल्ह्यातील प्रशासनातील अधिकारी, कर्मचारी, लोकप्रतिनिधी यांच्यावतीने पालखी सोहळ्यास निरोप देण्यात आला. दरम्यान सोलापूर जिल्ह्यातील प्रशासन व अन्य लोकप्रतिनिधींच्या वतीने पालखी सोहळ्याचे उत्स्फूर्त स्वागत करण्यात आले.