आमदार जयकुमार गोरे यांचा अपघात ; वाहन चालकाची प्रकृती गंभीर

एकता दर्शन (फलटण) : माणचे आमदार जयकुमार गोरे यांचे चारचाकी वाहन फलटणमधील बाणगंगा नदीच्या पुलावरून सुमारे ७०-८० फुट खाली कोसळून पडल्याने झालेल्या भिषण अपघातात आमदार गोरे यांच्यासह अन्य तिघेजण जखमी झाले आहेत. आ. गोरे यांना तात्काळ पुणे येथे उपचारासाठी हलविण्यात आले असून अन्य दोन अंगरक्षकांना बारामती येथील रूग्णालयात उपचारासाठी दाखल केले आहे. आमदार गोरे यांची प्रकृती उपचाराला उत्तम प्रतिसाद देत असल्याची माहिती पुणे येथील रुबी हॉस्पीटलमधील डॉक्टरांनी दिली आहे.

नागपूर अधिवेशन कामकाज उरकल्यानंतर आमदार गोरे पुण्याकडे रवाना झाले. पुण्याहून रात्री उशिरा आपल्या चारचाकी वाहनातून दहिवडीकडे निघाले होते. पहाटे ३:३० वाजता पुणे-पंढरपूर मार्गावरील मलठण (फलटण) हद्दीत असणाऱ्या बाणगंगा नदीपात्रावरील पुलाचा दगडी कठडा तोडून गाडी नदीपात्रात कोसळुन झालेल्या भिषण अपघातात आ. गोरे यांच्यासह अन्य तिघे जण जखमी झाले. दरम्यान, दस्तुरखुद्द आमदारांनी आपल्या गाडीचा अपघात झाल्याची माहिती खासदार रणजितसिंह यांना आपल्या मोबाईल वरून दिली. सुदैवाने खासदार फलटणमध्येच असल्याने तात्काळ खासदारांनी डॉक्टरांची टिम घेवुन काही क्षणार्धात अपघात स्थळ गाठले. स्थानिक डॉक्टरांच्या टिमने प्राथमिक उपचार केल्यानंतर आमदार गोरे यांना पुणे येथे उपचारासाठी तात्काळ हलविण्यात आले.

आमदार गोरे यांच्या छातीला मार लागला असून तीन बरगड्यांना दुखापत झाली असल्याची माहिती खासदार रणजितसिंह यांनी पुण्यातील रुबी हॉस्पीटल मधून दिली आहे. आ. गोरे उपचाराला योग्य प्रतिसाद देत असून घाबरण्याचे कारण नसल्याचे वैधकीय अधिकारी यांनी सांगितले आहे. आ. गोरे यांचे समवेत त्यांचे स्वीय सहाय्यक रूपेश साळुंखे यांची प्रकृती गंभीर असून त्यांना बारामतुहून पुणे येथे हलविण्यात आले आहे. अन्य दोघांवर (विलास दडस व अंगरक्षक बनसोडे) बारामती येथे उपचार सुरु आहेत.

खासदार रणजितसिंह डॉक्टरांच्या टीमसह मदतीला :

आमदार गोरे यांच्या अपघातानंतर खासदार रणजितसिंह फलटण येथील डॉ. जे.टी पोळ, डॉ. हेमंत मगर, डॉ. प्रविण आगवणे, डॉ. भगत, कुलकर्णी, कदम या डॉक्टरांच्या टीमला घेऊन अपघातस्थळी दाखल झाले. डॉक्टरांच्या टीमने त्यांच्यावर प्राथमिक उपचार केले. सध्या पुण्यातील रुबी हॉस्पिटल मध्ये आ. गोरे यांच्यावर वैयकीय उपचार सुरु असून भाजपाचे अनेक दिग्गज रुबीत दाखल झाले आहेत. खासदार रणजितसिंह नाईक-निंबाळकर व त्यांचे कुटुंबही दवाखान्यात उपस्थित आहे.