चंद्रकांत अहिवळे फलटणच्या सामाजिक चळवळीतील पँथर : केंद्रीय राज्यमंत्री रामदास आठवले

फलटण (एकता दर्शन) : दलित पँथर चळवळीतून स्वर्गीय चंद्रकांत अहिवळे यांनी जय भीमाचा नारा बुलंद करून तालुक्यातील अन्याय अत्याचाराला चोख प्रतिउत्तर देत पँथर सक्षम केल्यामुळेच मला राजकीय ताकद मिळाली. फलटणच्या राजकीय ताकदीमुळेच राजकारणातील सत्तेच्या संधी मिळाल्या असल्याचे सांगत फलटणने राजकीय ताकद दिली नसती, तर माझी देशभर ओळख झाली नसती. असे भावुक उद्गार केंद्रीय सामाजिक न्याय व सक्षमीकरण राज्यमंत्री रामदास आठवले यांनी काढले.

येथील पँथर चंद्रकांत अहिवळे यांचे नुकतेच निधन झाले, त्या पार्श्वभूमीवर फलटण रिपाईच्यावतीने भारतरत्न डॉ. बाबासाहेब आंबेडकर स्मृती भवन परिसरात शोकसभेचे आयोजन करण्यात आले होते, त्याप्रसंगी ना. आठवले बोलत होते. यावेळी माजी राज्यमंत्री राजाभाऊ सरोदे, रिपाईचे पश्चिम महाराष्ट्र अध्यक्ष प्रा. शहाजी बापू कांबळे, अण्णा वायदंडे, सुनिल सर्वगोड, ॲड. विजय गव्हाळे, राष्ट्रवादी कॉंग्रेसचे ज्येष्ठ नेते सुभाष शिंदे, भाजपाचे फलटण तालुकाध्यक्ष पै. बजरंग गावडे आदी उपस्थित होते.

पँथरच्या माध्यमातून डॉ. बाबासाहेब आंबेडकर यांच्या विचारांची चळवळ फलटणसह अन्य राज्यात उभी करण्याचे काम त्याकाळी तरूण वर्ग करत होता, आज रिपाईच्या माध्यमातून आम्ही करत आहे. सतत सर्वसामान्य कार्यकर्त्यांना सोबत घेवुन सामाजिक, राजकीय चळवळ केल्यामुळेच आम्हाला राज्य आणि केंद्रातील सत्तेची संधी मिळाली. या सत्तेच्या माध्यमातूनच सर्वसामान्यांचे काम होत आहे. विविध शासकीय योजना कार्यान्वित केल्या जात आहेत. त्यामुळे  सामान्यांच्या विकासाला चालना मिळत असल्याचे ना. आठवले यांनी यावेळी स्पष्ट केले.

पँथर चंद्रकांत अहिवळे प्रशासकीय सेवेत असतानासुद्धा ते माझ्या संपर्कात असायचे. त्यांनी अखेरपर्यंत मला सल्ला दिला, प्रेम दिलं. त्यांचा आदर्श घेवुन पुढील पिढीने समाजाचे काम करावे. बाबासाहेबांचा विचार पुढे न्यावा. सर्व-धर्म-समभाव अशी शिकवण देणाऱ्या भावनांची कदर करणारी भारतीय संस्कृती जोपासावी असे आवाहनही ना.आठवले यांनी केले.

प्रारंभी उपस्थित मान्यवरांनी स्वर्गीय अहिवळे यांच्या प्रतिमेला पुष्प अर्पण करून अभिवादन केले. यावेळी सुभाष शिंदे, राजा सरोदे, सुनिल सर्वगोड, अण्णा वायदंडे, विजय गव्हाळे, बजरंग गावडे, शहाजी कांबळे आदींनी आपले श्रद्धांजलीपर विचार व्यक्त केले. प्रास्ताविक विजय येवले यांनी केले. सुत्रसंचलन संजय निकाळजे यांनी केले. शोकसभेस सामाजिक, राजकीय क्षेत्रातील, व चळवळीतील प्रमुख पदाधिकारी, कार्यकर्ते मोठ्या संख्मेने उपस्थित होते.