प्रबोधनात्मक कार्यक्रमांनी डॉ.आंबेडकर जयंती साजरी करावी : प्रा. रमेश आढाव

एकता दर्शन (पिंपरद): भारतीय राज्यघटनेचे शिल्पकार डॉ.बाबासाहेब आंबेडकर यांचा विचार केंद्रबिंदू मानून समाजात जागृती व्हावी. डॉ.आंबेडकर जयंती हा उत्सव न राहता त्यांच्या विचारांचा रचनात्मक जागृतीचा प्रसार झाला पाहिजे असे सांगत या वर्षीचा जयंती सोहळा प्रबोधनात्मक कार्यक्रमातून साजरा करावा अशी अपेक्षा प्रा.रमेश आढाव यांनी व्यक्त केली.

पिंपरद ता.फलटण येथील डॉ.बाबासाहेब आंबेडकर जयंती महोत्सव समिती नोंदणीकृत प्रमाणपत्र वितरण व जयंतीपूर्व नियोजन कार्यक्रमात ते प्रमुख मार्गदर्शक म्हणून बोलत होते. यावेळी विद्युत क्षेत्र तांत्रिक कामगार युनियन सातारा सर्कलचे अध्यक्ष शरद मोरे, राज्यस्तरीय प्रिंट व डिजिटल मीडिया पत्रकार संघाचे सातारा जिल्हाध्यक्ष सचिन मोरे, संस्थेचे अध्यक्ष नीरज मोरे, उपाध्यक्ष विकास मोरे, सचिव विक्रांत मोरे आदी प्रमुख उपस्थित होते.

पिंपरद सारख्या ग्रामीण भागात जयंती सोहळ्याचे अधिकृत शासकीय नोंदणी मंडळ तरुणांच्या पुढाकाराने स्थापन होणे हे निश्चित समाज परिवर्तनाची दिशा आहे. डॉ.बाबासाहेब आंबेडकर यांचे विचार आचरणात आणण्यासाठी, स्पर्धात्मक युगात समाजातील तरुणांना योग्य दिशा देऊन त्यांना बौद्धिक प्रबळ बनवण्यासाठी जयंती मंडळ सुरू करत असलेले विविध सामाजिक उपक्रम व २०२३ मधील भीम जयंती डीजे व फटाकेमुक्त साजरी करणार असल्याने या मंडळाची भीम जयंती जिल्ह्यात आदर्शवत ठरेल असा विश्वास व्यक्त करत तरुणांसाठी ग्रंथालय, उद्योग निर्मितीच्या कार्यशाळा, महिलांसाठी विविध बचत गट योजना आदी उपक्रम जयंती मंडळाच्यावतीने राबवण्यात यावेत अशा सूचना प्रा.रमेश आढाव यांनी यावेळी केल्या.

सचिन मोरे म्हणाले, शासकीय नोंदणीकृत डॉ.आंबेडकर जयंती मंडळ व मंडळाच्या माध्यमातून होणारे उपक्रम काळाची गरज आहे. जयंती मंडळाच्या होणाऱ्या उपक्रमांना समाज नक्कीच स्वीकारेल. नवीन संकल्पना राबविताना अनेक अडचणींचा सामना करावा लागतो मात्र घेतलेल्या निर्णयावर ठाम राहणे हेच यशाचे गमक असते. बौद्धिक उंची कमी असणारे समाजात दुफळी निर्माण करतात त्यांना आपल्या कार्यातून उत्तर द्या.

शरद मोरे म्हणाले, २०२३ मध्ये साजरी होणारी भीम जयंती विविध जातीधर्मांना एकत्रित करून साजरी होईल. दिशादर्शक कार्य करणाऱ्या आंबेडकरी चळवळीतील ज्येष्ठ कार्यकर्त्यांचा सन्मान येणाऱ्या जयंती सोहळ्यात करणार असून विविध क्षेत्रातील यशस्वी मान्यवरांची व्याख्यानमाला सुरु करणार आहोत. यावर्षीचा डॉ.बाबासाहेब आंबेडकर जयंती उत्सव हा अभूतपूर्व सोहळा ठरेल असे सांगत पारदर्शक कारभार हा नोंदणीकृत संस्थेचा प्रमुख पाया असेल असे शरद मोरे यांनी यावेळी स्पष्ट केले.

प्रारंभी मान्यवरांच्या हस्ते भगवान बुद्ध व डॉ.बाबासाहेब आंबेडकर यांच्या प्रतिमेस पुष्प अर्पण करून अभिवादन करण्यात आले. दरम्यान डॉ.बाबासाहेब आंबेडकर संयुक्त जयंती मंडळाच्या अधिकृत शासकीय प्रमाणपत्राचे वितरण करण्यात आले. यावेळी विनोद गायकवाड, अमित खुडे, प्रसन मोरे, समीर मोरे, विजय बनसोडे, राहुल मोरे, संतोष मोहिते, हनुमंत मोरे, बापू मोरे, इंद्रजीत मोरे, अभिजीत मोरे, कुमार मोरे, तानाजी जाधव, शिवा पवार, गजानन पवार, श्रीरंग मोरे, गोविंद मोरे, रवींद्र पालखे, संजय बनसोडे, साजन कांबळे, सर्वेद मोरे, शुभम बनसोडे, राजदीप मोरे, ऋषिकेश बनसोडे, सुहान मोरे आदी उपस्थित होते.

कार्यक्रमाचे प्रास्ताविक शरद मोरे यांनी केले. आभार विकास मोरे यांनी मानले.