शशिकांत सोनवलकर व विक्रम चोरमले यांना प्रतिष्ठेचा दर्पण पुरस्कार जाहीर

एकता दर्शन : महाराष्ट्र पत्रकार कल्याण निधीचा यावर्षीचा राज्यस्तरीय दर्पण पुरस्कार ग्रामीण पत्रकार संघाचे माजी अध्यक्ष शशिकांत सोनवलकर आणि दैनिक सत्य सह्याद्रीचे फलटण तालुका प्रतिनिधी विक्रम चोरमले यांना घोषित करण्यात आला आहे.

वृत्तपत्रसृष्टीचे जनक 'दर्पण'कार आचार्य बाळशास्त्री जांभेकर यांच्या स्मरणार्थ हा पुरस्कार वृत्तपत्र क्षेत्रातील उल्लेखनीय काम करणाऱ्या पत्रकारांना दिला जातो. सदरच्या पुरस्काराची अधिकृत घोषणा महाराष्ट्र पत्रकार कल्याण निधीचे अध्यक्ष रवींद्र बेडकीहाळ यांनी आचार्य बाळशास्त्री जांभेकर यांच्या १७७व्या पुण्यतिथी निमित्त पोंभूर्ले (जि.सिंधुदुर्ग) येथे आयोजित अभिवादन  कार्यक्रमात केली आहे.

चोरमले यांनी तालुक्यातील विविध सामाजिक प्रश्न वृत्तपत्राच्या माध्यमातून प्रभावीपणे मांडून सर्वसामान्यांना न्याय मिळवून दिल्याच्या पार्श्वभूमीवर व गेली अनेक वर्षांपासून वृत्तपत्र, सामाजिक व शैक्षणिक क्षेत्रात वैशिष्ट्यपूर्ण कार्य करून प्रतिवर्षी दुधेबावी ग्रामविकास प्रतिष्ठानच्यावतीने व्याख्यानमाला आयोजित करत प्रबोधनाचे काम केले असल्याच्या पार्श्वभूमीवर शशिकांत सोनवलकर यांना प्रतिष्ठेचा मानला जाणारा दर्पण पुरस्कार जाहीर करण्यात आला आहे.

शशिकांत सोनवलकर व विक्रम चोरमले यांना पुरस्कार जाहीर झाल्याने फलटण तालुक्यातील वृत्तपत्र व सामाजिक क्षेत्रातील मान्यवरांच्याकडून त्यांचे अभिनंदन होत आहे.