नांदेड येथील दलित युवक हत्या प्रकरणाचा फलटणमध्ये निषेध

एकता दर्शन : नांदेड जिल्ह्यातील बोंडारी हवेली गावातील दलित तरूणाच्या निर्घृण हत्या प्रकरणातील आरोपींची उच्चस्तरीय चौकशी करुन संबधीत आरोपींवर कठोर कायदेशीर कारवाई करणेत यावी अशी मागणी आरपीआय (आठवले गट) फलटण शाखेच्यावतीने एका निवेदनाव्दारे करण्यात आली आहे.

भारतरत्न डॉ.बाबासाहेब आंबेडकर यांची जयंती साजरी केली म्हणून अक्षय भालेराव या दलित तरुणाची गावातील जातीयवादी गावगुंडांनी हत्या केली असल्याच्या घटनेचा निषेध करीत वरील मागणी रिपब्लिकन पार्टी ऑफ इंडिया (आठवले गट) फलटण शाखेने एका निवेदनाव्दारे केली आहे.

आंबेडकरी चळवळीतील कार्यकर्ता अक्षय भालेराव यांनी डॉ.आंबेडकर जयंतीची मिरवणूक काढली होती, याची मनात खदखद व्यक्त करीत काही समाजकंटकांनी हत्या घडवत जातीयवादी मानसिकता पुन्हा एखदा दाखवून दिली असल्याने या देशातला जातीयवाद अद्यापही संयुष्टात आला नसल्याचे या निवेदनात नमुद केले आहे.

या हत्या प्रकरणाची उच्चस्तरीय चौकशी व्हावी, भालेराव कुटुंबास शासनाने योग्य न्याय द्यावा, आर्थिक मदत करावी, सदरचा खटला फास्टट्रॅक कोर्टात चालविण्यात यावा, विशेष सरकारी वकिलाची नियुक्ती व्हावी, राज्यातील पुरोगामी समजणाऱ्या राज्यकर्त्यांनी या घटनेवर योग्य ते भाष्य करावे आदी मागण्या या निवेदनात करण्यात आल्या आहेत.

सदरचे निवेदन प्रांतअधिकारी यांना दि. ५ रोजी सकाळी ११ वाजता आरपीआय कार्यकर्त्यांनी दिले असून या निवेदनावर आरपीआयचे विजय येवले, मधुकर काकडे, मुन्ना शेख, संजय निकाळजे, राजू मारूडा, तेजस काकडे, लक्ष्मण अहिवळे, सतीश अहिवळे, महिला आघाडीच्या विमलताई काकडे, मीना काकडे, अलका बनसोडे, राखी कांबळे, ज्योती अहिवळे, सारिका अहिवळे, जयश्री अहिवळे, आशा काकडे या प्रमुख पदाधिकाऱ्यांसह अन्य कार्यकर्त्यांच्या सह्या आहेत.