सुरवडी : सुरवडी (ता. फलटण) येथील हॉटेल जॅक्सन इन्स मध्ये फलटण शहरातील व ग्रामीण भागातील व्यापाऱ्यांच्या सोयीसाठी खासदार रणजितसिंह नाईक-निंबाळकर यांनी आयोजित केलेल्या सेंट्रल बँकेच्या जनसंपर्क व वित्तसहाय्य अभियानास येथील व्यापाऱ्यांनी भरघोस प्रतिसाद दिला. याप्रसंगी सेट्रल बँकेचे एमडी आणि सीईओ एम.व्ही. राव, पुणे झोनल कार्यालयाचे महाप्रबंधक बी.बी. मुटरेजा यांची प्रमुख उपस्थिती होती.
यावेळी खासदार रणजितसिंह नाईक-निंबाळकर म्हणाले, केंद्र सरकारने सुरू केलेल्या जनधन, मुद्रा, पी.एम. किसान या योजनांसह कोरोना महामारीमुळे आर्थिक संकटात आलेल्या ३० टक्के व्यापाऱ्यांना विनातारण २० लाख कोटीचे अर्थसहाय्य केंद्र सरकारच्या मदतीने सेंट्रल बँकेने केले असून डॉक्टर व इतर व्यावसायिकांना २ कोटी पर्यंतचे वित्तीय अर्थसहाय्य होत असल्याने पंतप्रधान नरेंद्र मोदी यांचे आभार मानावे तेवढे कमीच आहे.
सेंट्रल बँकेचे एम. व्ही. राव यांनी यावेळी उपस्थित व्यापाऱ्यांना मार्गदर्शन करून बँकेच्या सर्व योजनांची माहिती देताना म्हणाले, खासदार रणजितसिंह नाईक-निंबाळकर हे शेती आणि व्यापार यासह आदी महत्वाच्या विषयावर बँकेच्या अधिकाऱ्यांसोबत चर्चा करून बँकिंग क्षेत्राला सहकार्य करत असतात. खासदार निंबाळकर यांनी सुचवल्याप्रमाणे आम्ही युवकांसाठी बँकिंग व व्यावसायिक क्षेत्रात सीएसआर योजनेची सुरुवात फलटण शाखेतून करत आहे.
याप्रसंगी प्रातिनिधिक स्वरूपात कर्जाच्या चेकचे वाटप व १०० कोटी रुपयांच्या कर्ज मंजुरीच्या पत्राचे वाटप खासदार रणजितसिंह नाईक-निंबाळकर व एम.व्ही. राव यांच्या हस्ते करण्यात आले. यावेळी सेंट्रल बँकेचे बी.बी. मुटरेजा, जी. रामकृष्णन, पी.एन. चौधरी, प्रदिप जाधव यांच्यासह फलटण शहरातील व परिसरातील असंख्य व्यापारी, शेतकरी, महिला बचत गट उपस्थित होते.
