नीरज चोप्राने रचला आणखी एक इतिहास ; जागतिक ऍथलेटिक्स चॅम्पियनशिप स्पर्धेत जिंकले ‘रौप्य’

एकता दर्शन : ओरेगॉन, (युनायटेड स्टेट्स, हेवर्ड फील्ड) येथे सुरु असलेल्या जागतिक ऍथलेटिक्स चॅम्पियनशिप स्पर्धेत पुरुष भालाफेक प्रकारात भारताच्या नीरज चोप्राने चौथ्या प्रयत्नात ८८.१३ मीटरचा सर्वोत्तम भालाफेक करून रौप्यपदक जिंकले. नीरज हा जागतिक ऍथलेटिक्स चॅम्पियनशिपमध्ये पदक जिंकणारा दुसरा भारतीय आणि पहिला पुरुष खेळाडू बनला. पॅरिसमध्ये २००३ रोजी झालेल्या जागतिक अजिंक्यपद स्पर्धेत लांबउडीपटू अंजू बूबी जॉर्ज हि कांस्यपदक जिंकणारी पहिली भारतीय होती.

जागतिक ऍथलेटिक्स चॅम्पियनशिप स्पर्धेचा आजचा शेवटचा दिवस आहे. स्पर्धेच्या शेवटच्या दिवशी पहिल्या प्रयत्नात फाऊल थ्रो करणाऱ्या नीरज चोप्राने दुसऱ्या प्रयत्नात ८२.३९ मीटर भालाफेक केली. तिसऱ्या प्रयत्नात त्याने ८६.३७ मीटर भालाफेक केली. चौथ्या प्रयत्नात ८८.१३ मीटर भालाफेक केली. नीरजचा पाचवा प्रयत्न फाऊल ठरला. चौथ्या प्रयत्नात केलेल्या ८८.१३ मीटरच्या भालाफेकीने नीरजने रौप्यपदकावर आपले नाव कोरले. अँडरसन पीटर्सने त्याच्या पहिल्या प्रयत्नात ९०.२१ मीटर भालाफेक केली. दुसऱ्या प्रयत्नात त्याने ९०.४६ मीटर भालाफेक करून पहिले स्थान कायम राखले. 

ऑलिम्पिकमध्ये सुवर्णपदक जिंकणारा नीरज आशियातील पहिला भालाफेकपटू असून आज जागतिक ऍथलेटिक्स चॅम्पियनशिप स्पर्धेत रौप्यपदक जिंकणारा दुसरा भारतीय आणि पहिला पुरुष खेळाडू बनण्याचा बहुमान मिळवत त्याने इतिहास रचला आहे.