उदय माहूरकर यांना श्रीमंत मालोजीराजे स्मृती पुरस्कार

एकता दर्शन : प्रतिवर्षाप्रमाणे देण्यात येणारा यावर्षीचा "श्रीमंत मालोजीराजे स्मृती पुरस्कार" केंद्रीय माहिती आयोगाचे आयुक्त, ज्येष्ठ पत्रकार व राजकीय विश्लेषक उदय माहूरकर यांना जाहीर करण्यात आला असून दि.१४ रोजी या पुरस्काराचे वितरण समारंभ पूर्वक होणार असल्याची माहिती श्रीमंत मालोजीराजे स्मृती प्रतिष्ठानचे सचिव प्राचार्य विश्वासराव देशमुख यांनी एका प्रसिद्धी पत्रकाव्दारे दिली आहे.

पुरस्कार वितरण दि.१४ मे २०२३ रोजी सायंकाळी ६ वाजता येथील मुधोजी हायस्कूलच्या रंगमंचावर विधान परिषदेचे माजी सभापती आमदार श्रीमंत रामराजे नाईक निंबाळकर यांच्या हस्ते प्रदान करण्यात येणार असून समारंभाचे अध्यक्षस्थान बुलडाणा अर्बन को.ऑप.क्रेडीट सोसायटीचे संस्थापक अध्यक्ष राधेश्याम चांडक भूषविणार आहेत. याप्रसंगी आमदार दीपक चव्हाण, श्रीमंत मालोजीराजे सहकारी बँकेचे चेअरमन संजीवराजे नाईक निंबाळकर, कृषी उत्पन्न बाजार समितीचे सभापती श्रीमंत रघुनाथराजे नाईक निंबाळकर, बुलडाणा अर्बन को.ऑप. सोसायटीचे मुख्य कार्यकारी अधिकारी शिरीष देशपांडे प्रमुख पाहुणे म्हणून उपस्थित राहणार आहेत.

सदरचा पुरस्कार श्रीमंत मालोजीराजे-राजेसाहेब यांच्या कार्याच्या स्मृतीप्रित्यर्थ श्रीमंत मालोजीराजे सह. बँकेच्यावतीने दिला जातो. प्रतिष्ठानच्या स्थापनेपासून यशवंतराव मोहिते, रा.ना. गोडबोले, बाळासाहेब भारदे, अनंतराव पाटील, प्राचार्य शिवाजीराव भोसले, बॅ.पी.जी. पाटील, डॉ.जयसिंगराव पवार, शिवशाहीर बाबासाहेब पुरंदरे, डॉ.ह.वि.सरदेसाई, डॉ.नरेंद्र जाधव, डॉ.आप्पासाहेब गोसावी, रावसाहेब शिंदे, विजय भटकर, डॉ.जयंत नारळीकर, सिंधुताई सपकाळ, डॉ.अनिल काकोडकर, डॉ.प्रकाश आमटे, डॉ.आ.ह. साळुंखे, डॉ.पतंगराव कदम, शरद पवार, गणपतराव देशमुख, डॉ.सदानंद मोरे आदींना देण्यात आला होता. यावर्षीच्या पुरस्काराचे मानकरी उदय माहूरकर आहेत.

सामाजिक व पत्रकारिता क्षेत्रात महत्वपुर्ण योगदान, प्रसिद्ध लेखक, राष्ट्रीय स्तरावरील राजकीय विश्लेषक, इंडिया टुडे मासिक वरीष्ठ उपसंपादक, विविध ग्रंथाचे लेखन, संस्कृती वाचवा देश वाचवा अभियान, न्यायदानातील अनेक निवाड्यांचा निपटारा आदी विविध क्षेत्रात उल्लेखनीय काम केल्याच्या पार्श्वभूमीवर माहूरकर यांना सदरचा पुरस्कार दिला असल्याचे प्रतिष्ठानच्यावतीने सांगण्यात आले.

या कार्यक्रमास शहर व तालुक्यातील नागरिकांनी उपस्थित रहावे असे आवाहन श्रीमंत मालोजीराजे स्मृती प्रतिष्ठान व श्रीमंत मालोजीराजे सहकारी बॅंक यांचे वतीने करण्यात आले आहे.