कलासंस्कृतीची परंपरा विद्यार्थ्यांनी जोपासावी : श्रीरंग काटेकर

एकता दर्शन (लिंब, सातारा) : आनंदी जीवन जगण्यासाठी कला संस्कृतीची लाभलेली परंपरा विद्यार्थ्यांनी अखंडपणे जोपासावी असे मत गौरीशंकरचे जनसंपर्क अधिकारी श्रीरंग काटेकर यांनी व्यक्त केले.

लिंब ता.सातारा येथील गौरीशंकर डी.फार्मसी महाविद्यालयाच्या वार्षिक स्नेहसंमेलनच्या उद्घाटन प्रसंगी ते बोलत होते. यावेळी प्राचार्य विजय राजे, प्रा.सविता मोरे, प्रा.सारिका लोखंडे, सांस्कृतिक विभागाचे प्रमुख प्रा.स्वाती पवार, प्रा.स्नेहल माने, प्रा.रणजित थवरे, रजिस्ट्रार चंद्रकांत बडदे, गणेश घाडगे आदी प्रमुख उपस्थित होते.

श्रीरंग काटेकर पुढे म्हणाले, महाविद्यालयांच्या स्नेहसंमेलनातून निर्माण होणारे संस्कार विद्यार्थ्यांच्या उज्वल करिअरसाठी महत्वपूर्ण असून स्नेह आपुलकी ऋणूबंधाचे नाते अधिक घट्ट होण्यासाठी स्नेहसंमेलनाचे व्यासपीठ विद्यार्थ्यांना उपयुक्त ठरते. विद्यार्थ्यांना आपल्या स्वतःमधील कलागुणांना वाव देण्यासाठी वार्षिक स्नेहसंमेलन म्हणजे हक्काची संधी असते.

प्राचार्य विजय राजे म्हणाले, उत्साह, चैतन्य, जोश हे आत्मविश्वास उंचविण्यासाठी कामी येते त्यासाठी स्नेहसंमेलनाचे व्यासपीठ विद्यार्थ्यांना मिळणे गरजेचे आहे. विविध वेशभूषा व कलाअविष्काराच्या अनोख्या दर्शनातून राष्ट्रीय ऐक्य एकात्मतेची भावना वाढते. विद्यार्थ्यांमधील कला संस्कृतीला संधी देण्यासाठी आम्ही दरवर्षी स्नेहसंमेलनाचे आयोजन करतो. दरम्यान विद्यार्थ्यांनी सोलो डान्स, ग्रुप डान्स, फॅन्सी ड्रेस, कॉकटेल डान्स व फॅशन शोचे उत्तम सादरीकरण  करून उपस्थितांची मने जिंकली.

स्नेहसंमेलनाचे प्रास्ताविक राजश्री कुलकर्णी यांनी केले. आभार प्रा.स्वाती पवार यांनी मानले.