जर्मनी देशाने केला डॉ.अजित कुलकर्णी यांचा सन्मान ; औषधनिर्मितीत नवे संशोधन

एकता दर्शन (लिंब, सातारा) : संशोधनातून नवनिर्मिती करणारे गौरीशंकर इन्स्टिट्यूट ऑफ फार्मास्युटिकल एज्युकेशन अँड रिसर्च लिंब महाविद्यालयाचे प्राचार्य डॉ. अजित कुलकर्णी यांनी औषध निर्माणशास्त्र शाखेत नवीन संशोधनात्मक कार्य केल्याबद्दल जर्मन देशाकडून पेटंट देवून त्यांना सन्मानित करण्यात आले.

डॉ. कुलकर्णी यांनी देशी वनस्पतीवर केलेल्या संशोधनाची दखल जर्मनी देशातील औषधनिर्माण शास्त्र क्षेत्रातील तज्ञांनी घेत विविध निकषांच्या अधीन राहून त्यांची पेटंटसाठी निवड केली आहे. डॉ. कुलकर्णी यांच्या निवडीबद्दल गौरीशंकरचे संस्थापक अध्यक्ष मदनराव जगताप यांच्याहस्ते त्यांचा सन्मान करण्यात आला. यावेळी संस्थेचे प्रशासकीय अधिकारी नितिन मुडलगीकर, जनसंपर्क अधिकारी श्रीरंग काटेकर, उपप्राचार्य डॉ. योगेश गुरव, रजिस्ट्रार निलेश पाटील आदी प्रमुख उपस्थित होते.

याप्रसंगी डॉ. कुलकर्णी म्हणाले, संशोधन करताना वेगवेगळ्या वनस्पतींचे गुणधर्म व त्याबाबतची उपयुक्तता याची सांगड घालून पॉलीहर्बल जेल (Polyherbal Gel) तयार करून त्याची उपयुक्तता मानवी शरीरात निर्माण होणार्‍या संसर्गजन्य आजारावर तपासून पाहिले असता असे आढळून आले कि, नैसर्गिक उपचार अधिक परिणामकारक ठरतात, तसेच बुरशी अथवा सूक्ष्मजीवांमुळे निर्माण होणाऱ्या संसर्गावर नैसर्गिक औषधामुळे चांगल्या पद्धतीने उपचार होऊ शकतो.

प्रारंभी कार्यक्रमाचे प्रास्ताविक व शेवटी आभार उपप्राचार्य डॉ.योगेश गुरव यांनी मानले.

डॉ.अजित कुलकर्णी गेली २० वर्षांहून अधिक काळ शैक्षणिक क्षेत्रात कार्यरत आहेत. विविध वनस्पतींवर त्यांनी सखोल संशोधन केले आहे. मानवी शरीरातील आजार व त्यावर परिणामकारक उपचार याबाबत राष्ट्रीय व आंतरराष्ट्रीय स्तरावर शोधनिबंध सादर केले आहेत. जवळपास १६ प्रकल्प (Project) व आंतरराष्ट्रीय स्तरावरील सेमिनार मध्ये त्यांचा सहभाग राहिला आहे. डॉ. कुलकर्णी यांच्या नावावर यापूर्वीही एक पेटंट प्राप्त झाले आहे.

अभिमानस्पद कामगिरी

परिश्रम, जिद्द, चिकाटी व सकारत्मकतेचा ध्यास घेऊन, ध्येयवादाने प्रेरित होऊन औषधनिर्माण शास्त्र क्षेत्रात नाविन्यपूर्ण संशोधन करणारे गौरीशंकर बी.फार्मसी लिंबचे प्राचार्य डॉ.अजित कुलकर्णी यांनी विविध वनस्पतींवर केलेले सूक्ष्म निरीक्षण व सखोल संशोधनात्मक कार्याची दखल जर्मनी देशाने घेऊन त्यांना पेंटट देवून गौरविले. डॉ. कुलकर्णी यांची आंतरराष्ट्रीय स्तरावर घेतलेली दखल सातारा जिल्ह्याच्या दृष्टीने भूषणावह ठरली असल्याने त्यांचे सर्वत्र कौतुक होत असून त्यांच्यावर अभिनंदनाचा वर्षाव होत आहे.