निरा देवघर प्रकल्पासह अन्य कोट्यावधीच्या कामांना प्रशासकीय मंजुरी : खासदार रणजितसिंह यांची माहिती

एकता दर्शन (मुंबई) : खंडाळा, फलटण, माळशिरस, सांगोला या दुष्काळी भागातील तालुक्यांना वरदान ठरणाऱ्या निरा देवघर धरण अंतर्गत कालव्यासह अन्य प्रलंबीत कामांना ३९७६ कोटी, फलटण-पंढरपूर रेल्वे मार्गाच्या ९२१ कोटी रूपयांच्या प्रशासकीय कामांना राज्याचे उपमुख्यमंत्री देवेंद्र फडणवीस यांनी मंजुरी दिली असून अन्य फलटण तालुक्यातील कामांनाही आर्थिक तरतुदीसह मंजुरी दिली असल्याची माहिती खासदार रणजितसिंह नाईक निंबाळकर यांनी दिली आहे.

मुंबई येथे झालेल्या बैठकीत उपमुख्यमंत्री देवेंद्र फडणवीस यांनी माढा लोकसभा मतदारसंघातील विविध कामांना प्रशासकीय मान्यता दिली असल्याचे सांगत फलटण निरा देवघर अपूर्ण व प्रलंबीत कामे पूर्ण करणे हा शब्द आपण जनतेला दिला होता तो आज पूर्ण झाला आहे. या कामांमुळे फलटण तालुक्यातील १३५५० हेक्टर क्षेत्र, माळशिरस तालुक्यातील १०९७० हेक्टर क्षेत्र ओलिताखाली येणार आहे. दोन्ही तालुक्याच्या लाभक्षेत्रातील ६७ गावातील शेतकऱ्यांना लाभ होणार असल्याचे खासदार रणजितसिंह यांनी निदर्शनास आणून दिले.

वरील महत्वपूर्ण कामांशिवाय नाईक बोमवाडी (ता. फलटण) येथील नियोजीत औद्योगिक वसाहतीस मान्यता, झिरपवाडीतील बंद अवस्थेत असणारे ग्रामीण रूग्णालय सुरू करण्याचे निर्देश फडणवीस यांनी दिले असून या कामासाठी ६२ कोटींची आर्थिक तरतूदही करण्यात आली आहे. फलटण व माढा तालुक्यात मंजुर असणाऱ्या सेशन न्यायालयाची इमारत व इतर सुविधा निर्मितीसाठी आवश्यक निधीही मंजुर झाला आहे. १०० केव्हिए क्षमतेचे ३०० नवीन विद्युत रोहित्र मंजुर करण्यात आले असल्याचे सांगत निवडून आल्यानंतर जनतेला दिलेल्या आश्वासनांपैकी निरा देवघरचे काम हे शेवटचे काम होते, ते काम सुरू होणार असल्याने आपणास आनंद होत असल्याचे खासदार नाईक-निंबाळकर यांनी सांगितले आहे.

सरकारचे आभार :

मुंबईतील या बैठकीकडे तालुक्यातील अनेकांचे कान लागते होते. खासदारांच्या विविध कामांना उपमुख्यमंत्री फडणवीस यांनी आर्थिक तरतुदीसह प्रशासकीय मान्यता दिल्याची वार्ता वाऱ्यासारखी फलटण भागात धडकली. त्यानंतर भाजप पदाधिकारी व कार्यकर्त्यांनी येथील चौका-चौकात फटाके फोडून राज्य सरकार, मुख्यमंत्री, व उपमुख्यमंत्री यांच्या नावाचा जयघोष व आभार करीत आनंद व्यक्त केला.

लोकनेते स्वर्गीय हिंदुराव यांचे स्वप्न साकार :

निरा देवघर धरण व्हावे यासाठी खासदार म्हणून निवडून आल्यानंतर स्वर्गीय हिंदुराव नाईक-निंबाळकर यांनी सर्वप्रथम शिखर शिंगणापूरपासून पदयात्रा काढली होती. खासदारकीची विजयी मिरवणूक न काढता, हारतुरे न स्वीकारता धरण निर्मितीसाठी पदयात्रेच्या माध्यमातून आंदोलन सुरू केले, या आंदोलनाचे कौतुक सर्वत्र झाले. त्यानंतर २०१९ रोजी त्यांचे सुपुत्र रणजितसिंह खासदार झाले. आपल्या वडिलांनी पाहिलेली स्वप्ने (रेल्वे, निरा देवघर व अन्य प्रकल्प) त्यांचे चिरंजीव आज पूर्ण करताना दिसत आहेत.