बुलढाणा अर्बनच्या मोफत स्पर्धा परीक्षा ग्रंथालयाचा विद्यार्थ्यांनी लाभ घ्यावा : जिल्हाधिकारी रुचेश जयवंशी

एकता दर्शन (सातारा) : बुलढाणा अर्बन को-ऑपरेटिव्ह क्रेडिट सोसायटीचा मोफत स्पर्धा परीक्षा मार्गदर्शन केंद्र व ग्रंथालयाचा उपक्रम सर्व सामान्य वर्गातील विद्यार्थ्यांसाठी उपयुक्त असून विद्यार्थ्यांनी त्याचा लाभ घेतला पाहिजे असे सांगत स्पर्धा परीक्षा ग्रंथालयाच्या माध्यमातून विद्यार्थ्यांना आवश्यक असणाऱ्या सर्व सोयी सुविधा उपलब्ध होतील अशी अपेक्षा सातारा जिल्हाधिकारी रुचेश जयवंशी यांनी व्यक्त केली.

बुलढाणा अर्बन को-ऑपरेटिव्ह क्रेडिट सोसायटीच्या सातारा शाखेच्या बाराव्या आणि सातारा महिला शाखेच्या पाचव्या वर्धापन दिनानिमित्त सदर बझार येथील मोफत स्पर्धा परीक्षा ग्रंथालय व मार्गदर्शन केंद्राच्या शुभारंभ प्रसंगी ते बोलत होते.

यावेळी सातारा उपप्रादेशिक परिवहन अधिकारी विनोद चव्हाण, सातारा शाखेचे मुख्य कार्यकारी अधिकारी शिरीष देशपांडे, विभागीय अधिकारी मनोहर देशमुख, सौ.शिल्पा कुलकर्णी, योगिनी पोकळे, गुरुनाथ लोखंडे, मालोजीराजे बँकेचे मुख्य कार्यकारी अधिकारी राजेश लढ्ढा, पुणे कमर्शियल को-ऑपरेटिव्ह बँकेच्या अध्यक्षा स्वाती लढ्ढा, उपाध्यक्ष विजय चव्हाण, मुख्य कार्यकारी अधिकारी मुकुंद कुलकर्णी, अजिंक्य सहकारी मुद्रणालयाचे तानाजी शिंदे आदी प्रमुख उपस्थित होते.

बुलढाणा अर्बन को-ऑपरेटिव्ह क्रेडिट सोसायटीच्या फलटण येथील शाखेत स्पर्धा परीक्षा केंद्रात सहभागी झालेल्या दोनशे विद्यार्थ्यांनी विविध परीक्षांमध्ये यशाची उत्तुंग भरारी घेतली आहे याच पार्श्वभूमीवर सातारा शाखेतील स्पर्धा परीक्षा ग्रंथालयात कामकाज करून सर्वसामान्य विद्यार्थ्यांना या ग्रंथालयाचा लाभ मिळवून द्यावा अशी अपेक्षा व्यक्त करीत आर्थिक अडचणीमुळे ज्या विद्यार्थ्यांना स्पर्धा परीक्षेमध्ये सहभागी होता येत नाही त्या विद्यार्थ्यांना या बँकेने संधी उपलब्ध करून दिली असून संधीचे सोने करून विद्यार्थ्यांनी आपले भविष्य घडवावे असे जिल्हाधिकारी यांनी यावेळी स्पष्ट केले.

अभिजित यादव म्हणाले, स्पर्धा परीक्षेमध्ये सहभागी होण्याची इच्छा असतानाही केवळ आर्थिक अडचणींमुळे गरीब विद्यार्थ्यांना परीक्षा देता येत नाही. परीक्षा फी किंवा पुस्तक खरेदीसाठी लागणारे पैसे पालकांच्याकडे नसतात हि अडचण बुलढाणा अर्बन को-ऑपरेटिव्ह सोसायटीच्या माध्यमातून आता दूर झाली आहे त्यामुळे सातारा शहरच नव्हे तर परिसरातील विद्यार्थ्यांनी मोठ्या प्रमाणावर या ग्रंथालयाचा लाभ घ्यावा व अभ्यासावर लक्ष केंद्रित करावे त्यांना यश निश्चित मिळेल याची ग्वाही यावेळी त्यांनी दिली.

कार्यक्रमाचे सूत्रसंचालन व्यवस्थापिका सारिका देशमुख यांनी केले. कार्यक्रमास पुणे कमर्शियल को-ऑपरेटिव्ह बँकेचे सर्व संचालक, बुलढाणा अर्बन को-ऑपरेटिव्ह क्रेडिट सोसायटीच्या शाखेचे प्रमुख पदाधिकारी, कर्मचारी, ग्राहक व विद्यार्थी मोठ्या संख्येने उपस्थित होते.