खा.रणजितसिंह यांच्या प्रचारार्थ उपमुख्यमंत्री फडणवीस यांची फलटणमध्ये जाहीर सभा

प्रतिनिधी फलटण : माढा लोकसभा मतदारसंघातील भारतीय जनता पार्टीचे उमेदवार व विद्यमान खासदार रणजितसिंह नाईक-निंबाळकर यांच्या प्रचारार्थ दि. ५ मे रोजी फलटण येथील छत्रपती शिवाजी महाराज चौकात लोकसभा निवडणूक प्रचारातील शेवटची सभा महाराष्ट्र राज्याचे उपमुख्यमंत्री देवेंद्र फडणवीस यांच्या अध्यक्षतेखाली होणार असल्याची माहिती फलटण-कोरेगाव विधानसभा प्रमुख सचिन कांबळे-पाटील यांनी दिली आहे.

लोकसभा निवडणूक २०२४ मधील महायुतीचे उमेदवार खासदार रणजितसिंह नाईक-निंबाळकर यांच्या प्रचार व प्रसिद्धी कार्यक्रमाचा आढावा, प्रचाराची सांगता सभा नियोजन या संदर्भात सुरवडी (ता.फलटण) येथील निसर्ग हॉटेलमध्ये प्रमुख कार्यकर्त्यांच्या बैठकीचे आयोजन करण्यात आले होते, यावेळी सचिन कांबळे-पाटील, जयकुमार शिंदे बोलत होते. याप्रसंगी भारतीय जनता पार्टी महाराष्ट्र प्रदेश उपाध्यक्ष आमदार प्रसाद लाड, महायुतीचे अधिकृत उमेदवार खासदार रणजितसिंह नाईक निंबाळकर, भारतीय जनता पार्टी महाराष्ट्र प्रदेश लोकसभा निवडणूक प्रमुख श्री.कर्जतकर, ज्येष्ठ नेते प्रल्हादराव साळुंखे-पाटील, श्रीमंत शिवरूपराजे खर्डेकर, धनंजय साळुंखे-पाटील, अमरसिंह नाईक-निंबाळकर, माजी सनदी अधिकारी विश्वासराव भोसले, जयकुमार शिंदे, अशोकराव जाधव, विक्रम आप्पा भोसले, पैलवान बजरंग गावडे उपस्थित होते.

कार्यकर्त्यांना मार्गदर्शन करताना आमदार प्रसाद लाड म्हणाले, आपल्या मतदारसंघातील जनतेच्या अपेक्षा पूर्ण करण्याबरोबरच विकासाची अनेक कामे मार्गी लावली असल्याने सर्वसामान्यांमध्ये लोकप्रिय झालेल्या खासदार रणजितसिंह यांच्या शब्दाला केंद्र व राज्य सरकारमध्ये मोठ्याप्रमाणात किंमत असून उपमुख्यमंत्री देवेंद्र फडणवीस यांच्या हृदयामध्ये त्यांच्यासाठी खास जागा निर्माण झाली आहे. देशाचे पंतप्रधान नरेंद्र मोदी, केंद्रीय गृह व सहकार मंत्री अमित शहा, राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, दुसरे उपमुख्यमंत्री अजित पवार यांचे आशीर्वाद खासदार रणजितसिंह यांच्या पाठीशी असल्याने व मतदारसंघातील बहुसंख्य मतदार त्यांच्यावर मनापासून प्रेम करीत असल्याने त्यांच्या विजयाची आम्हाला निश्चित खात्री आहे. कार्यकर्त्यांनी आता सर्वाधिक मताधिक्य मिळवण्यासाठी प्रत्येक बुथवर मनापासून काम करून कमळ चिन्हाला जास्तीत जास्त मतदान कसे होईल यासाठी प्रयत्न करावेत.

दि. ५ मे रोजी होणाऱ्या फलटण येथील प्रचाराच्या सांगता सभेसाठी संपूर्ण माढा लोकसभा मतदारसंघातील भारतीय जनता पार्टी व मित्र पक्षांचे पदाधिकारी, कार्यकर्ते मतदार बंधू-भगिनी, तरुण वर्ग यांनी मोठ्या संख्येने उपस्थित राहण्याचे आवाहन महायुतीच्यावतीने यावेळी करण्यात आले आहे. यावेळी महायुतीचे प्रमुख पदाधिकारी व कार्यकर्ते मोठ्या संख्येने उपस्थित होते.