विविध मागण्यांसाठी फलटणमध्ये उपोषण

एकता दर्शन, फलटण : मराठा समाजाला १३ टक्के आरक्षण मिळावे, धनगर समाजाला एसटी प्रवर्गातील आरक्षण द्यावे, बार्टीमार्फत दोन हजार मागासवर्गीय विद्यार्थ्यांची परदेशी शिक्षणासाठी निवड व त्यासाठी लागणारा निधी उपलब्ध करावा, मुस्लिम समाजासाठीचे ५ टक्के मंजूर आरक्षणाची अंमलबजावणी करावी, या आणि अशा विविध मागण्यांसाठी येथील प्रांत कार्यालयासमोर सेवानिवृत्त महसूल कर्मचारी संजय अहिवळे यांनी लाक्षणिक उपोषण सुरू केले आहे.

शेतकऱ्यांना मोफत वीज द्यावी, थकित वीज बिल माफ करावे, राज्यातील महसूल विभागातील सर्व मंडल अधिकाऱ्यांचे वेतन वेळेवर व्हावे यासाठी लागणारी ग्रँड मंजूर करावी, पोलीस अधिकारी कर्मचारी यांची पगारवाढ करून त्यांच्यासाठी नवीन पक्की घरे बांधावीत, सरकारी कर्मचाऱ्यांना जुनी पेन्शन योजना लागू करावी, मागासवर्गीय आयोग नेमावा आदी मागण्यांचा समावेश अहिवळे यांनी एका निवेदनात केला आहे.

या निवेदनाच्या प्रती मुख्यमंत्री, उपमुख्यमंत्री, अल्पसंख्याक राज्यमंत्री, समाजकल्याण मंत्री, सातारा जिल्हाधिकारी, जिल्हा पोलीस प्रमुख, प्रांत अधिकारी फलटण आदींना पाठविण्यात आल्या असून अहिवळे यांनी स्वतः या निवेदनावर स्वाक्षरी केली आहे.

राज्य सरकारने या विविध मागण्यांचा विचार सहानभूतीपूर्वक करावा अन्यथा मंत्रालयासमोर अमरण उपोषणास बसणार असल्याचा निर्धार अहिवळे यावेळी व्यक्त केला आहे.