विडणी सोसायटीवर राष्ट्रवादी प्रणित उत्तरेश्वर पॅनेलचे वर्चस्व

एकता दर्शन (विडणी, ता. फलटण) : अवघ्या तालुक्याचे लक्ष लागलेल्या विडणी विविध कार्यकारी सहकारी सोसायटीच्या पंचवार्षिक निवडणुकीत राष्ट्रवादी कॉंग्रेस प्रणित उत्तरेश्वर पॅनेलने संचालकपदाच्या १३ जागांवर विजय मिळविला. भाजपच्या विरोधी गटाला एकही जागा जिंकता आली नसल्याने १३-० असा विजय प्राप्त करीत या सोसायटीवर उत्तरेश्वर पॅनेलने वर्चस्व सिध्द केले आहे.

विडणी सोसायटी कोट्यावधींची आर्थिक उलाढाल करणारी असल्याने या सोसायटीच्या निवडणुकीत राष्ट्रवादी आणि भाजप पुरस्कृत दोन पॅनेलमध्ये दुरंगी लढत झाली. निवडणूक प्रचारादरम्यान खासदार गटातील अनेक दिग्गजांनी निवडणुकीचे मैदान गाजवले असले तरी भाजपच्या गळाला एकही जागा लागली नाही.

सोसायटीच्या १९०७ सभासदांपैकी १६३३ सभासदांनी मतदान केले होते. यात ७८ मतदान बाद झाले. १५५५ मतदान वैद्य झाले. मतमोजणी सुरू झाल्यानंतर राष्ट्रवादी काँग्रेस प्रणित उत्तरेश्वर पॅनेलची विजयाच्या दिशेने घौडदौड सुरू झाली होती अखेर या पॅनेलने सर्वच्या सर्व १३ जागा जिंकत भाजप प्रणित विकास आघाडीतील सर्व उमेदवारांचा धुव्वा केला. यावेळी निवडणूक निर्णय अधिकारी शेखर साळुंखे यांनी विजयी उमेदवारांच्या नावांची अधिकृत घोषणा केली.

संचालकपदाच्या विजयी उमेदवारांमध्ये रामदास नाळे, साहेबराव ननावरे, बाळू पवार, मारूती उर्फ श्रीनिवास पवार, किसन शेंडे, विलास अभंग, सोनबा आदलिंगे, जयश्री टिळकर, विजया पवार, मुरलीधर जगताप, लक्ष्मण कोकरे, मारूती नाळे यांचा समावेश आहे.

विजयी उमेदवारांचे राष्ट्रवादी काँग्रेसचे ज्येष्ठ नेते आमदार श्रीमंत रामराजे नाईक निंबाळकर, आमदार दीपक चव्हाण, श्रीमंत संजीवराजे नाईक निंबाळकर, श्रीमंत रघुनाथराजे नाईक निंबाळकर, श्रीमंत विश्वजितराजे नाईक निंबाळकर, डॉ. बाळासाहेब शेंडे आदींनी अभिनंदन केले.