पुण्यश्लोक अहिल्यादेवी होळकर पुरस्कारासाठी प्रस्ताव सादर करावेत

एकता दर्शन, सातारा : महाराष्ट्र शासनाच्या महिला व बालविकास विभागामार्फत महिला व बालविकास क्षेत्रात उल्लेखनीय कामगिरी करणाऱ्या महिला व संस्थांना प्रतिवर्षी 'पुण्यश्लोक अहिल्यादेवी होळकर पुरस्कार' देवून सन्मानित करण्यात येते, या पार्श्वभमीवर सन २०२०-२१, २०२१-२२, २०२२-२३, २०२३-२४ या ४ वर्षांकरिता पुरस्कारासाठी महिला व संस्थांकडून प्रस्ताव मागविण्यात येत आहेत.

राज्यस्तरीय पुरस्कार प्राप्त महिला/संस्थेकरिता १ लाख १ रुपया, स्मृतिचिन्ह, सन्मानपत्र, शाल, श्रीफळ असे पुरस्काराचे स्वरूप आहे. या पुरस्कारासाठी महिला व बालविकास क्षेत्रात किमान २५ वर्षांचा सामाजिक कार्याचा अनुभव असणे आवश्यक आहे. ज्या महिलांना जिल्हास्तरीय 'पुण्यश्लोक अहिल्यादेवी होळकर पुरस्कार', दलितमित्र पुरस्कार, सावित्रीबाई फुले पुरस्कार प्राप्त झाला आहे त्या महिला ५ वर्षांपर्यंत राज्यस्तरीय पुरस्कारासाठी पात्र नसतील.

विभागस्तरीय पुरस्कार प्राप्त महिला/संस्थेकरिता २५ हजार १ रुपया रोख, स्मृतिचिन्ह, सन्मानपत्र, शाल, श्रीफळ असे पुरस्काराचे स्वरूप आहे. या पुरस्कारासाठी महिला व बालविकास क्षेत्रात संस्थेचे किमान ७ वर्षे कार्य असावे. नोंदणीकृत संस्थेस दलित मित्र पुरस्कार प्राप्त नसावा. संस्था राजकारणापासून अलिप्त असावी. तिचे कार्य व सेवा राजकारणापासून अलिप्त असावे.

जिल्हास्तरीय पुरस्कार प्राप्त महिला/संस्थेकरिता १० हजार १ रुपया रोख, स्मृतिचिन्ह, सन्मानपत्र, शाल, श्रीफळ असे पुरस्काराचे स्वरूप आहे. या पुरस्कारासाठी महिला व बालविकास क्षेत्रात किमान १० वर्षांचे सामाजिक कार्य असावे. ज्या महिलांना दलित मित्र पुरस्कार, सावित्रीबाई फुले पुरस्कार मिळालेला आहे त्या महिलांना हा जिल्हास्तरीय पुरस्कार अनुज्ञेय राहणार नाही.

पुरस्कारासाठी इच्छुक असणाऱ्या महिला व संस्थांनी अधिक माहितीसाठी महिला व बालविकास अधिकारी सातारा यांचे कार्यालय नवीन प्रशासकीय इमारत दुसरा मजला एसटी स्टँड जवळ सातारा (क्रमांक : ०२१६२-२३७३५३) इथे संपर्क करावा. आवश्यक त्या सर्व कागदपत्रांसह आपला प्रस्ताव अर्ज व वर्षासह ४ प्रतीत दि.३१ जुलै २०२३ पर्यंत कार्यालयात सादर करावा, असे आवाहन जिल्हा महिला बालविकास अधिकारी व्ही.ए. तावरे यांनी केले आहे.